CENTRAL SPIRIT LEADS US TO EXCEL

“CENTRAL SPIRIT LEADS US TO EXCEL” 

2nd Place – CPU U-Day 2003 (Geevie Lou Palec – BSECE-3)

Manaya-naya ang langit kon wala sang gal-um
Makanay-kanay ang dagat kon tulok-tulokon
Makawiwili ang nawong kon may napagkit nga yuhum
Gani yuhum sa wala, yuhum sa tuo, yuhum paibabaw kag idalum 
Kay diri sa CPU, ang yuhum, amg yuhum nagadala kaanyag kg katahum


Sg ako una nga magsulod sa sining eskwelahan
Ako nagatalang-talang kag wala ko mahibal-an
Central Spirit nga ginasugid wala ko mabatyagan
Ang iya buot silingon, indi ko masayran kag wala ko mahangpan


Apang sa paglipas sg malip-ot nga panahon
Kadungan sg pagtuon, mga pag-attend CEW kg convocation
Nagtudok sg himpit sa akon nga tagipusuon
Ang Central Spirit gali sa Ginuo napalig-on


Ang Central Spirit indi mo makita, indi mo matamdan
Mabudlay ipaathag, kag mabudlay nga imitlang
Bisan ano pa kalaba sg binalaybay magakulang
Sa paghatag kahulugan sa Central Spirit nga pangalan    


Kay paano mo ipaathag ang mga nabatyagan
Sa tagsa ka pagkitaay sg mga Centralian 
Ang kahidlaw, kakunyag, kag pag-ulikid sa eskwelahan 
Nga sa pagpauli ang CPU campus iya gid bisitahan!


Kung wala ang Central Spirit ano na ayhan?
Student Union kg Centennial Nursing Building bala matuman?
Ang mga scholarships, donations sg alumni pasalamatan  
Kay diin man nga nasyon mapahamtang, CPU handa gid nga buligan  


O CPU sa imo indi gid ako magkalipat
Kay ang Central Spirit kaupod ko gid sa paglakat 
Naga-iwag sa akon, nagasiga sang wala pag-untat
Nagapahanumdum sa akon sg eksakto kg nagakadapat


Kay diri sa CPU, kita ang nagaeskuwela
Kita ang ginahanas, kita ang ginahulma
Para mangin handa kag takus, sa trabaho kag obra
Paagi sa Central Spirit nga sa EXCEL sa aton magadala 


Gani Central Spirit, padayon, padayon
Sa paghanas, paghulma, pagtuytoy sa amon
Padulong sa banas nga hilway kag matarung
Kay kami nga kabataan ang buasdamlag, ang palaabuton 


Ang Central Spirit ang maga-ugyon sa aton
Magapabaskug balatyagon, magahatag sg rason
Kay ang Central Spirit, Ginuo ang pundasyon
Para ang Exemplary Christian Education for Life maaangkon!


Salamat sa mg huwes kg mga tumalambong
Kamo tanan mga guapa, subong man maambong
Akon lang sa gihapon sa inyo ipahanumdum 
Ang yuhum, ang yuhum, iplaster sa nawong!  

ANG E. COLI

ANG E. COLI

(delivered during PIChE-CPUJC induction and acquaintance party at Coco Grove, Tigbauan, Iloilo, August 4, 7:00 PM)

Ang akon binalaybay, is about sa tumalagsahon nga bagay
Isa ka tinuga nga magamay, ngalan ya Eschirichia coli
Ang E. coli, bow!


Ang E. coli nga mikrobyo, ay abaw! Tam-an ka delikado
Sa lawas peligroso, pati kalag mo apektado
Apang ang E coli itsura ya ano?
Ang iya dagway daw pareho kay sin-o?
Ang E. coli kuno, daw katulad sg ChE Department... logo!
May ara imbudo, derecho sa lababo, hapit sa enodoro, pakadto sa septic tank- derecho sa poso negro!


Apang ano gid bala ang epekto kon E. coli matilawan?
Sobra pa sa pan-os nga sandwich sa canteen nabaklan
Pamangkuta si Kleah, buhi pa nga pamatuod sg pan-os nasampulan
Kon siya nagniliwang, sa E. coli naman bilin na lang sa imo puro tul-an!
Sir Ojario, wala ta ka ginapabati-batian!


Kon si Jaylord Maderaje, nagtalang wala katul-tol Jolibee
Ang bulong dira, E. coli sa iya bala patestingi
I'm sure cya magasala-sala, dayon palak sg grabe
Sigurado sa Coco Grove lapaw cya, ara na sa Antique!


Kay ang tawo nga naagyan sg E. coli
Sobra pa sa buang, nagalalaway
Sobra pa sa hubog, gasuluka, hangkat inaway
Future mo guba na, waay na kasulhay kg kalipay!


Kon ang E. coli imo madilapan
Ang imo tiyan, daw sa washing machine nga linabhan
Ginalubid kag ginapuga-an
Hala sa kasilyas dayon mo dalagan!


Kon ikaw matambok kg gusto magniwang
Slimming tea nga E. coli, ang imo lang kinahanglan
Isa ka tulo epektibo, tam-an ka masaligan
Isa ka kilo tabug dayon, sa CR i-flush lamang


Apang ang E. coli, sa diin gid bala makit-an?
Kasan-o nadiskubrehan, sa diin ang puluy-an?
Hambal sg iban madamu sa kadagatan
Ang hambal ko naman, mas madamu sa eskwelahan


Ang E. coli wala sa pan-os nga tinapay
Wala sa hangin, indi matransfer sa aton laway
Tanging sa tubig lamang ito nabubuhay
Tubig na contaminated, tubig na nakamamatay!


In fact ang ChE induction kg acquaintance party
Diutayan lang wala madayon, tungod sa E. coli nga peste
Na-stress ang estudyante, na-torture ang presidente
E. coli I hate you, my friend you will never be!


If for dengue, mosquitoes we should go after
E. coli on the other hand means the presence of fecal matter
And so I won't elaborate any further
Because you might vomit what you ate for supper
Just remember, where there's E. coli, our lives are in danger!


Gani tulok sa wala, tulok sa tuo
Basi ang tupad mo, mutant E. coli nga tawo
Simple lang ang diskarte para makilala mo
Haksa sg hugot kg simhuti sg todo


Gani E. coli kung nilalangit
Nilalangaw pati ang puwet
Sa akin hwag na hwag kang lumapit
'Coz for me you really are nothing but just a piece of shit!


...By the way akon lang nga idugang
Si Yogi Jalaf sg kan-on naubusan
Sarsa sg chicken curry ahay amo na lang an ginmatiniran
Subong nga gab-i may leksyon nga natun-an nga 
Sa bug-os nga kabuhi indi malipatan!


So next time organizers inyo gid dumduma
Ang absent nga teachers isipa kg inyo sakpa
Kay basi man bala magsakit ang buot nila
Pati na gid ang tawo nga ang ila presencia iya gid ginadala!!!

ANG BAM-I

ANG BAM-I

Impromptu Binalaybay IIEE Induction Program (9:00PM Iloilo Grand Hotel 8/17/2007)

Sa sini nga gabi-i, sa induction sg IIEE
Damu pagkaon, especially ang bam-i
May lengua, fishball, morkon, kg bam-i nga specialty
Nauna ubos ang rice kg tapos ulihi, ang bam-i syempre 

Ang bam-i manamit, kon wala ka na pilian
Pwede nga kan-on, pwede pa sud-an
Pwede nga sumsuman, sa may ilimnan
Apang subong nga gab-i daw ako nasobrahan


Perfect combination, bam-i kg IIEE
Ang pansit kg sotanghon daw mga alambre
May diutay nga dahon-dahon kg mga karne-karne
Nga kon imo tunlon, daw ikaw nakoryente


Gani bisan ako isa lang ka proxy
Kay Sir Ramon, Ma'am Babylou kg tani ky Sir Vitini
Karon mahamuok pagtulog sa gab-i
Tungod sa bam-i, bam-i, bam-i
Nga ang equivalent isa ka libo nga boltahe


Kon si Sir Armadillo ang lengua
Kay siya medyo na tig-a
Ang fishball si Sir Java
Kay siya medyo kalbo na


Sir Jag mabuot na siya, guapo pa
Pero mas mabuot kg mas guapo si Sir Dany Molina
Sir Vitini nga-a nag-abot ka pa?
Isa ka pa tani ka pinggan, bam-i sa akon nareserba!

BINALAYBAY PARA kay RAMON kg ANN

BINALAYBAY PARA kay RAMON kg ANN

NI BERNIE CANGREJO

Bag-o ang akon binalaybay ipaalinton
Ang inyo pasaylo akon gid anay pangayu-on
Para sa akon binalybay nga daw wala ka man hangpon
Kay kagab-i lang gindihon, pagkatapos ko paniapon


Akon naobserbahan, diri sa aton kalibutan
Ang gintuga nga tanan may ara gid kabangdanan
May ara mga butang nga nagakinahanglan
Nga mag-upod kay kon indi, wala meaning kg kapuslanan


Halimbawa, kon may adan may eba
Kon may florante may laura
Kon may Mark Anthony may Cleopatra
Kag kon may Mam Margen may Sir Bert Java


Kon may Juliet may Romeo
Gani kon may Ann Panes may Ramon Alguidano
Nga kabay lang indi mangin James Yap kg Kris Aquino
Kabay wla eskandalo, palayo sa clinic ni Vicky Belo


Sa lamesa, kon may tinidor, may kutsara
Para sigurado, ubos ang paskua
Kutsaraha ang afritada, tinidora ang achara
Pareho man sa paghigugma, dapat timbanganay sa obra


Sa patahian, kon may hilo, may ara dagum
Nga kon imo sila paga-upodon
Pwede matahi sa tela, cotton man o maong
Gani kamo sa pagtilaw magkaupod nga atubangon


Sa uma, kon may lusong, ara ang hal-o
Ang baye-baye kg pinipig, mahuman nga maayo
Pati linupak nga saging sigurado aprubado
Tungod sa pasensya kg kapisan sg gabayo nga tawo


Sa engg, kon may cylinder may ara gid piston
Wheel and axle, action and reaction
Kuhaa ang isa sigurado magamalfunction
Diutay nga lubrication, kamo man mangin perfect combination


Sa chemistry, kon may basic may acidic
Sodium hydroxide kg muriatic
Kon imo icombine naganeutral nga daw magic
So use your strengths and weaknesses for your life to be fantastic!


Sa ECE, kon may transmitter may receiver
Gani sa relationship dapat may giver and taker
Kon may offender may forgiver
Para you will be together, forever


Sa bakery, kon may monay nga tinapay
May bitsukoy man with kalamay
Gani akon lang ipangabay, indi gid mag-inaway
Instead obra baby pan de sal, nga bunga sg paghigugmaanay


Gani kon icombine Ramon kg Ann Marie
Ang balay sa Pavia, para between Alimodian kg San Enrique
Kurso sg ila bata ECE major in Chemistry
Icombine puti kg itum, iya kolor kundi khaki


Kon si Ramon ang hala lapta
Ikaw Ann magpasensiya, hala himusa
Kag kon si Ramon ang medyo sala-sala
Ikaw Ann ang dapat medyo magpakalma


Kag kon si Ann ang magluto utan
Ok na kay Ramon maski wala sud-an
Bisan ako indi na pag-imbitahan
Basta kamo magkasalo sa hapag kainan


Gani Ramon kg Ann Marie
Magpangamuyo gid kamo pirme
Kay ang Gino-o ang haligi
Sang isa ka happy nga family!


Gani kon ako ang inyo pamangkuton
Syempre wla duada bagay Si Ann kg Ramon
Kon ako iya san-o pagakaslon
Syempre ang sabat ara sa palaabuton….

THE CASE OF THE UNIVERSAL UNIFORM

THE CASE OF THE UNIVERSAL UNIFORM (UNIPORME PANGKALAWAKAN)

by TATAK TIYANAK, Dec. 2007

Sa isa ka universe, may isa ka  23-hectare nga planeta
Planeta Centralia, may nagkalain-lain nga tinuga
May ara siyam ang dapa-dapa, may isa ka libo ang mata
May ara nga daw bola-bola, kag may ara man pula-pula!


Sa sini nga planeta, aliens may nagkalain-lain nga rasa
Apang may maayong pagtamdanay ang kada tagsa-tagsa
Nagakabuhi sg matawhay, wala sg kon ano nga malisya
Bisan pa nga ang kada isa, wala panapton- nagauba!


Tuig 7002, nagdeklarar sg memorandum
Nga dapat ang tanan nga aliens, magsuksok uniform
Nga dapat sundon, sa labing madali nga panahon
Kay ang indi mag-ugyon, sa planeta paga-tabugon


Nagpanic ang mga Martians, mga ET wala natulugan
Nagsalasala ang tanan, sa balita nga nabatian
Kay tiempo alang-alang, sa masunod na kuno nga bulan
Kag kuarta may natigan-an, na-budget na sa tuition kg sud-an


Ang indi mahangpan, sg mga aliens nga kadam-an
Uniform nga naga-igpat may ara bala kapuslanan?
Matakpan bala kg mailisan, ang malain nga batasan?
Kag iya bala mapapisan, ang mga tamaran kg natak-an?
(Kag iya bala mapaalam, ang mga ligoy nga kabataan?) 


Ang hambal sg hari kinahanglan protection
Kontra sa terrorism, rebellion, kg alien invasion
Kay mahapos kilalahon, ma-identify sa gilayon
Not to mention, ang kolor nga sip-on, manami tan-awon


Kay wala sg mahimu, nagpati ang tanan
Ginsuksok ang uniform, ang mandu gintuman
Ang wala mahibal-an kag wala madiskubrehan
Ang nagabadlak nga uniform may dala nga kalaglagan


Kay sa ila planeta manipis ang hangin
Limitado ang supply sg oxygen for living 
Bangud sa uniform, there was difficulty in breathing
Madamu sa mga alien, started to feel like dying


Ang tuyo sg hari daw maayo man, kon isip-isipon
Wala lang consultation, so there's no realization
That the king, unlike the aliens- isa ka anaerobic organism
Wala nagakinahanglan oxgygen for coping mechanism!


And what my friend is the moral lesson?
From this universal story of annihilation
Simple consultation and open communication
Could have prevented the massive alien extinction!

MANOK

MANOK

NI TATAK TIYANAK

(Binalaybay delivered during IIEE Induction 2006 at Four Season Hotel 9/15/06)


Kon akon ilaragway, organisasyon nga IIEE
Daw sya kaangay sg kay Roel Mendoza nga poultry
Kag kamo syempre, mga EE nga estudyante
Mapaangid man sa sapat nga ga-iti, wla’y liwan- chicken-nene!


Gani welcome sa induction sa bulangan
Rasa sg tanan nga manok imo makit-an
Sweater, lemon, kelso, hatchet nga inugbulang
Upod sa 45 days, saso, caber nga bolohan!


Gani gud evening sa tanan nga manok nakaporma
Cobra kag corabot nga naka-kurbata
Bantam kg londong nga naka-amerikana
Pati ang bisaya, nakabarong kg gel pa!


Una sa listahan, Al-Shahawy Ian John
Original sa manokan, manok nga Egyptian
Daw manok nga bag-ong kopa, kon imo hisayran
Gabaka sa karsada, putak-putak di mapunggan!


Si Mark Guillergan daw manok nga layaw
Kahig diri, kahig didto, wala untat lagaw-lagaw
20 Thousand ang nadag-an, sa TAYO nangibabaw
Itago ang 10 thousand, ang iban sa induction ipaayaw.


Daw manok nga texas, si Larry Baylon palalupad
Daw manok nga tiktik, aswang ang bansag
Sa basketbol grabe patumbuon, grabe parebound-non 
Gani man naka-iskor nobya nga white leghorn!


Charlton Jualayba, nga naga-antipara
Daw Chicken Little ang iya hitsura
Kon imo tulukon daw sa mataha ka
Daw madamu nabal-an, gali kuskos lang gitara!


Si Barry Jone Matutina, daw manok nga gin-aratay
Daw survivor sa pagkapulak, daw kulang sa palay
Si Jon Michael Naces, daw manok nga Van Tress
Daw wla ko may matsismis, manok baligya  na lang appliances!


Ara sulog nga baraw, si Andrew Camarig
Kulang sa shuffle, kulang sa kahig
Kon imo lihugon, abaw tam-an kadasig
Pero kon sa chicks, kulang sa abtik


Si Donald Fundal daw basa nga pisu
Tam-an ka hipuson pirme gasiburo
Jason Surabilla, daw manok nga langka-langka
Daw katuka sg tanga, hala sige sala-sala


Kon ikaw gapangita manok nga hulo
Ara man medyo sindikato, Darroca, Rumulo
Kon ikaw gapangita manok nga native
Si Edward Nonescan, ako bilib kg epektib!


Si Percival Carnaje kg RN Sagre, pwede chicken curry
Jon Joven Isidto, pwede chicken adobo
Si Vergara, Ed, pwede man chicken spread
Enri John Guatelara, fried chiken with achara


Kon gusto nyo manok nga inugbulang
Ara si Erwin Leofred Invina pwede mapustahan
Pero diyes-siete, sya biya sigurado
Kon sa iya ipasampok Joven Isidto nga pabo!


Mga third year medyo gasala-sala pa
Kon sa manok daw may sakit nga coryza
Vetracin kg doxylac tablet lang ang pangontra 
Para sa derby sigurado daug sa sultada 


Mga fouth year nga electrical engineering
Pirme lang gatumpok-tumpok kag nagateren-teren
Daw mga manok nga medyo tarin-tarin
Manamit nga linagpang kg tinola nga native chicken,
45 Days nga fried chicken


Kag bag-o ko malimtan, mga chicks nga partners palakpakan!
Kabay subong nga gab-i may padulungan
Kon indi tukaan, pwede man sagupaan
Basta hinay-hinay lang sa maaslum nga buko pandan!


Subong sa bulangan
Kumpleto ang tanan!
Sir Dany Molina ang handler
Sir Magallanes ang gaffer
Sir Jagorin ang llamador
Kg yours truly ang sentensiyador!


Syempre ara advisers, Sir Alberto Java kg Sir Acanto
Mga mabuot nga tawo, maalam kg guapo
Kon sa manok- hmmm sikreto, delikado basi manurumpo
Kag sa sunod nga induction di na ako kakadto!
Gani maayong gab-i na lang sa inyo
Toktorook, I say thank you!

ENGKANTO

ENGKANTO

NI TATAK TIYANAK

Bag-o ang binalaybay akon suguran
Ako gapakilala, gapangayo katahuran
Ako engineering alumnus nga Centralian
Bangkay nga nagbangon halin sa lulubngan


Kay akon nabalitaan sg una napierde
Engineering kay wala nagbarong indi kuno pwede
Sa sina nga punto ako indi kumporme
Wala nagapati, sa rason nga technicality


Kay para sa akon manubo nga pag-intiende
Ang magbinalaybay buluhaton ta nga libre
Sin-o kag ano ka man, basta magbinalaybay ok
Bisan ikaw pa naga-uba kg naga-tuwad nga ati!


Gani ako nagbangon sa mahamuok ko nga katulogon
Para magtambong, kag sa binalaybay kita mag-ugyon, 
Gani pormal nakabarong, kumpleto algudon sa ilong
Para wala rason, kag ako ila dagdagon


Ako ang nagdamgo sg una kuno nga tiempo
CPU buluthu-an, sg nagkalain lain nga engkanto
Sa kada building may nagapuyo nga maligno 
May bagat kag murto sa  madulum nga kanto


Sa building sang Theo, may naga-istar nga tamawo
Kumpare kag amigo, ang classmate nga mantiyo
Kada Sabado sa MO2,  sila ang nagadisco
Ang ila dancing lights amo ang santermo 


Sa building sg Roblee may nagapanabako nga kapre
May tiktik gahuni sa Fanklin dormitory
May galagaw nga zombie sa Henry Luce Library
Kag sa highschool laboratory may kama-kama kg dwende


Ang campus napuno sang kabudlay kag kagamo
Kay nagdagsa madamu nga mga maligno
Kada isa may gusto, may himuon nga misteryo
Kalaglagan sang CPU, sa ulihi sigurado


Apang maayo lang nag-abot ang manugpangapin
Si Engr. Constantine nga nag-kontra sa mga malain
Central Spirit ang gahum, EXCEL ang taming
Ang pagtuo sa Ginuo amo ang 


Gani ginpapas ang mga malain ginhawa
Ginpalayas, ang tayhu, wakwak kg bakwa
Ang tiyanak kag bampira, ang nagasalasala
Sa Central Spirit nga puwersa, wala may makakontra!


Ang akon istorya isa lang ka palaanggiran
Ang mga maligno, amo ang aton malain nga batasan
Ang indi pag-intindihanay sa CPU nga katilingban
Mga kukulangan kg sa iya mission nga nalipatan!


Gani ibalik ang Central Spirit, nga Ginuo ang sadsaran
Aton panumdumon nga estudyante labing gamhanan
Kag sa administrayon,  ginahangkat ko nga pamatud-an
That the students are still central at central, may kamatuoran!


Gani akon na balikan, sementeryo nga lulubngan
Apang magapabilin nga kamo bantayan
Kag inyo tandaaan, kamo murtuhon kg balikan
Kon inyo pakahuy-an, CPU nga pangalan!

ISDA (VERSION 2010)

ISDA (VERSION 2010)

(2nd Place 2010 U-Day Binalaybay Contest)
Delivered by Donie Edama PkgE-4


Ang akon binalaybay, naghalin pa sa idalum sg baybay
Sa dagat nga makanay-kanay ang istorya nabalay
Akon igasaysay, inisda nga binalaybay
Kg kabay nga malipay, bisan gamay kg diutay.


Kon CPU nga eskwelahan, sa isda ipalaangiran
Kita nga Centralians, daw may isda batasan
Daw tangigue kg tulingan, bagis, balyena, kg bulgan
Ay abaw! Kaladlawan, apang may pagtulun-an 


Halimbawa abi nakon, kamo nga tumalambong
Kon magyuhum-yuhom daw sa bangrus ang nawong
Ang mga hurado naton, kon imo tulok-tulokon
Magayon kg maambong, daw isda nga bilong-bilong!


Subong akon ipakilala, nagkalain-lain nga isdaa
Nursing, Education, High School, kg Medisina
AS kg CS, CBA, CHM kg Agrikultura
Pati ang Kindergarten, Graduate School kg Elementarya

Ang mga Education nga daw bukaw-bukaw
Sa may Old Valentine naga-lagawlagaw
Laban tanga-tanga, daw sa lipong nga gusaw
Manamit ipamasaw, himuon nga kinilaw!


Ang Agri nga ganit, daw pinakas nga panit
Sa ulan nagasulay, sa adlaw gapainit
Maisug ang anghit, hilamon ginagan-it
Kundi ang ila panit, pinamalhan nga liwit!


Ang CS kg AS, mga isda nga sapsap
Hampang sg computer games, ay abaw wala untat
Sa Acclaim nga lambat, sila galumpat-lumpat
Sa pagtuon di malipat, kay may aman guripat


Ara ang CBA nga mga estudyante
Daw man-og nga sili, daw hilu nga butete
Kon mangolorite, daw metallic nga guppy
Ang ila nga halok, daw kissing gurami!


Ang nagapanong nga mga Nurses
Daw sardinas sa bariles
Daw tilapia ang himbis
Lawayan nga isda kung magtsismis


Ang mga High School nga kabalan
Daw nagaguban nga gurayan
Daw mga turagsoy nga lagawan
Manami himbisan, tuktukon sa tapalan


Apang sa pag-abot sg panahon
Sg U-Day nga selebrasyon
Mga isda nagatipon-tipon
Nagahugpong kg naga-hili-ugyon


Gani sa U-Day, mga isda nagsambuwa
May ara basketbol, volleybol kg swimming palumba
Ang Nursing sa putbol, daw dolphin magsipa
Dayon ngirit sang bangkil, daw piranha kalaba


Sa palumba dalagan, mga isda naglangoy
Nag-sambuwa Korean koi kontra Pinoy nga tuloy
Disqualified sa karera, nagtalang nga butitoy
Ulihi sa tanan, ang aloy, kalulu-oy!


Literary kg musical contest, lain-lain ang activities, 
Nagcheerdance ang flying pis, nagchoral ang clown pis
Fighting pis kg janitor pis, nagpaindis-indis
Pati stick pis kg bagis, nag-entra sa Mr and Ms 


“Meeting Succesfully the Opportunities and Challenges of Life as Centralians”ang tema
Sa sini nga hugada, nagsinggit ang arwana 
“Opportunities and Challenges sa aton kabuhi makaya”
“Centralians, EXCEL!”, dayon saligbat sg karpa


Kapag-on sg Centralians, sa alumni makita mo
Sa isganan nga lapu-lapu, kg mapisan nga pisugo
Sa maabtik nga puyo, kg maka-Diyos nga karaho,
Indi, magtig-a ulo, pareho sa isda nga paco


Bisan sa illegal fishing, dinamita malukpan
Pagtilaw sg kalibutan, padayon ginaatubang
Sa balud kg hangin, indi gid malingkang 
Sa CPU sadsaran, Ginu-o gid pasalamatan!


Sa sini nga tiempo, binalaybay tapuson ko
Bag-o mangin lub-ok, nga isda nga abo
Kag akon nga gusto, ipahanumdum sa inyo
“Save the pawikans, save the butandings... save our oceans!” - Fish be with you...


“Roll over the ocean, roll over the sea, (aha/say what?)
Roll over the ocean in the deep blue sea.” (That's right!/ yehey!) 2x