ANG ISDA (VERSION 2008)

Ang Isda

ni TATAK TIYANAK

(6th Place 2008 CPU-Uday Binalaybay Contest)
Delivered by Lech Benigno Catacutan BSEE-5


Ang akon binalaybay, naghalin pa sa idalum sg baybay
Sa dagat nga makanay-kanay ang akon istorya nabalay
Sg tiempo nga dugay-dugay, sg wala pa tawo sa Panay
Nga ginsaysay pa sg nanay, sg tatay ni nanay


Sa kaibuturan sg kadagatan, mga isda may ginharian
Malapit sa Guimaras Island,  sg oil spill naulaan
CPO ila bulutho-an, Central Pacific Ocean ang ngalan
Kg diri ko pagasuguran, ang akon inisda nga kasaysayan


Gani sa baybayon kita magpanakayon
Sa dagat nga madalum, kita magpadulong
Mga isda kilalahon, kg kon aton usisaon
Sila man kaangay naton, sa batasan kg nawong, kon isip-isipon


Kon ini nga eskwelahan, sa mga isda ipalaangiran
Ang mga Centralians, daw may isda man sg batasan
Daw sa tangigue, tuna, tulingan, ang iba bagis, balyena, kg bulgan
Ay abaw! Kaladlawan apang may pagtulun-an nga masayran


Halimbawa abi nakon, kamo nga tumalambong
Kon kamo magyuhum-yuhom daw sa bangrus ang nawong
Ang mga hurado naton, kung imo tulok-tulokon
Magayon kg maambong, daw isda nga bilong-bilong!


Apang bag-o ako magderecho, ako anay mapakilala sa inyo
Ako gali si Nemo, isa ka pantat nga African Hito
Kurso enhinyero, electrical nga departamento
Maalam, kg guapo, saburoso, garantisado!


Subong akon ipakilala, ang nagkalain-lain nga isdaa
Nursing, Education, High School, kg Medisina
CS kg AS, CBA, IHT kg Agrikultura
Pati ang Kindergarten, Graduate School kg Elementarya


Ang mga Education nga bukaw-bukaw
Sa may Old Valentine nagatinungkaaw
Laban tanga-tanga, daw lipong nga gusaw
Manamit ipamasaw, himuon nga kinilaw


Ang mga Agri nga anghit, daw pinakas nga panit
Sa ulan nagasulay, sa adlaw gapainit
Nagakulo sang arado, ang hilamon ginagan-it
Kundi ang itsura daw pinamalhan nga liwit


Ang mga Computer Studies, isda nga sapsap
Hampang sg computer games, ay abaw wala untat
Sa lambat sg Acclaim sila galumpat-lumpat
Sa pagtuon di malipat, kay may aman guripat


Ang mga estudyante, sg College of IHT
Daw man-og nga sili, daw hilu nga butete
Ang ila nga halok daw kissing gurami
Kag kon mangolorite, daw metallic nga guppy


Ang nagapanong nga mga Nurses
Daw mga sardinas sa bariles
Daw mga tilapia ang himbis
Kag daw lawayan nga isda kung magtsismis


Ang mga High School nga kabalan
Daw nagaguban nga gurayan
Daw mga turagsoy nga lagawan
Manami himbisan sa tapalan


Apang sa pag-abot sg panahon
Sg Ocean Day nga selebrasyon
Mga isda nagatipon-tipon
Nagahugpong kg naga-ugyon


Kay kada tuig sa eskwelahan, Ocean Day ginaangan-angan
Kay diri nagahinampang, isda nga katilingban
May contest sa paalam-alam, alimusan kontra halo-an
Sa dance sport nagtimbang, alimango kg pasayan


Gani sa Ocean Day, ang mga isda nagsambuwa
May ara basketbol, volleybol kg swimming palumba
Ang Nursing sa putbol, daw dolphin magsipa
Dayon ngirit sang bangkil, daw piranha kalaba


Sa palumba dalagan, mga isda naglangoy
Nag-intra Korean koi versus Philippine tuloy
Disqualified sa karera, nagtalang nga butitoy
Ulihi sa tanan, ang aloy, kalulu-oy


Lain-lain ang activities, literary kg musical contest 
Nagcheerdance ang flying pis, nagchoral ang angel pis
Fighting pis, clown pis, janitor pis, nagapaindis-indis
Pati stick fish kg bagis, nagpalista sa Mr and Ms 


Sa subong nga Ocean Day masaku ang tanan
Ang mapait nga uga, nagreklamo sa alamutan
Huo man, siling ni pasayan, kada hulag may balayran
Energy fee kg tuition fee wla pa gani maimpasan


Apang nga bisan, nagapula ang hasang sg iban
Tungod sa illegal fisfhing, dinamita nalukpan
Apang sa gihapon masadya ang tanan
Kay sa Ocean Day sadsaran, Ginu-o gid pasalamatan!


“CPU's heritage: Our response to today's challenges”ang tema
Sang Ocean Day ginaselebra, sa sini nga hugada
“Ipabugal ang heritage ta!”, nagsinggit ang arwana 
“Sabat sa hangkat kg problema!”, dayon tugda sg karpa


Ang heritage sg CPU, sa alumni makita mo
Sa mga isganan nga lapu-lapu,
Mapisan nga pisugo, kg maka-Diyos nga karaho
Indi lang magtig-a ulo, sg daw isda nga paco


Gani sa sini nga tiempo, binalaybay untatan ko
Bag-o mangin lub-ok, nga isda nga abo
Ang akon lang nga gusto, ipahanumdum sa inyo
“Save the dugongs, save the pawikans, save the butandings... save our oceans!” 


....Fish be with you...


(Exit...)


“Roll over the ocean, roll over the sea,
Roll over the ocean in the deep blue sea.” (2x)